"هي العِشرة بتهون بسهولة!"

جملة سمعتها من فترة و خلتني فعلا افكر كتير .. ايه دافع انه انسان يسيب حد بعد ما كانوا لبعض كل شئ و وقفتهم جنب بعض بالدنيا و كانوا دايمًا سوا في كل موقف .. بل و مش مجرد يسيبه والموضوع يتقفل .. في بعض الأحيان ممكن يتكلم عنه في ضهره و يطلعه غلطان و وِحش بـ شتي الطرق اللي يقدر عليها و كل ذرة حب و وِد تقلب فجأة كره و غِل .. ورُبّما قبل رحيله سيُحاول تأليف سيناريو مُحبَك ليجعلك مُذنِباً في كُلّ شيء!

البعض أساتذةٌ فى ذلك .. و كل الذكريات و لحظاتكم سوا في ثانية كدا تتنسي .. وكأنها لم تكن من الاساس .. و تمر عليك لحظات من الانكار و تفضل تتسائل ازاي كان دا فلان اللي كنت جنبه في كل حزنه و لحظات ضعفه .. تستغرب حال الدنيا و تغيراتها .. 

تبدأ ثقتك في الجميع تتناقص وتبدأ تحس بشعور الوحدة .. تفضل تفكر مفروض ايه الخطوة الجاية ، ازاي مفروض ارجع اتعامل مع الناس بعد اللي حصل و يكون الحزن و التفكير الانهزامي مُسيطرين عليك بشكل كبير و ساعتها الشئ اللي لازم تعمله هو الصبر .. لازم تكون واثق في حكمة الله و ان كل شئ لمصلحتك .. و انت تستاهل حاجة اجمل بكتير من اللي كانت معاك و لسة ربنا هيعوّضك اكيد ..

"يَا لَعُمْقِ غِنَى اللهِ وَحِكْمَتِهِ وَعِلْمِهِ! مَا أَبْعَدَ أَحْكَامَهُ عَنِ الْفَحْصِ وَطُرُقَهُ عَنِ الاسْتِقْصَاءِ!"

 اي شخص بيكون محظوظ بـ شئ معين ، بشكل عام ربنا مبيسيبش حد لوحده حتي وسط همومك هيبعتلك شئ يعزيك لحد ما يوريك الفرحة الكبيرة اللي مجهزهالك لأنه اكيد مش هيدخلك في مشاكل بدون ما يكون وراها حكمة ما فوق ادراكك دايمًا كل شيء بيكون للخير سواء مشاكل شغل أو دراسة .. رحيل صديق كان الاقرب وبعدها صدقني هتعرف ان بُعده كان الاحسن رغم انه مكنش علي هوّاك .. بأمانة لن يكون هناك من هو احن عليك من الله في كل تفاصيل حياتك 

  افتكر كام مرة كنت تعبان وربنا قوّمك وشفاك ، كام مرة نجاك من كارثة .. لازم تشكره اوعي تحاول تتمرد أو تتزمر علي اي شئ خليك دايمًا راضي وساعتها فقط اضمنلك انك هتشوف دايمًا خير وتعويضات مكنتش تحلم بيها .. بس انت خليك واثق في ربنا وهتدوق حاجات كتير جميلة .. كلنا في نِعَم لا تُحصى ولا تُعد فاشكره على كل شئ .. دايمًا هيختارلك الافضل و في افضل وقت هو الفاحص الكُلى والقلوب وعالم كل ما تفكر به .. فالحمد لله على كل حالٍ

 دايمًا وسط الحياة بيبقي كل اللي الواحد عايزه انه يوصل لدرجة من السلام النفسي تخليه ميقلقش أو يعيش وسط توتر أو حزن و اكتئاب .. و خصوصًا وسط المشاكل و التجارب بالذات بيبقي كل اللي في بالك انك عايز تقفل عينك تفتحها تلاقي كل حاجة خلصت و بقي حواليك هدوء ، و بالرغم انه فعلا بين غمضة عينٍ و انتباهتها يُغيّر الله من حالٍ الي حال .. لكن دايمًا الانسان بيكون شايل هم كل حاجة حواليه .. مش بيحط في باله ابدًا إن كل دا هيعدي و هنفتكره بعدين و نقول ياااااه كانت دي اكبر مشاكلنا و نضرب كف في كف و نضحك.

  نادرًا ما بتلاقي حد مرسخ جوا نفسه قواعد تساعده انه يتجاوز مشاكله بشكل صحي .. بدون خوف و قلق او انه يسيب المشكلة للي في ايديه مفتاح و حل كل حاجة في الدنيا .. و مع ذلك لو جيت تبص لأي شئ في ماضيك هتلاقي إن ربنا عداك رغم انك برضو كنت ايامها .بتقول انك مش قادر أو كل دا تقيل عليك و احيانًا كنت بتتذمر

 دايمًا كل حاجة بتحصل بتكون سبب لخير قدام ، و بشكل انت متتخيلوش .. عمر ما حد كان يتخيل إن اخواته لما يرموه في بير هيوصل لشئ زي انه يكون الرجل الثاني في مصر و ينقذ العالم كله -بما فيهم اخواته اللي رموه- من مجاعة عظيمة .. بس يوسف كان .دايمًا واثق في ربنا .. و هي دي النقطة اللي لازم نكون مركزين عليها .. كله للخير سواء انت شايف دا او لا بس صدقني كله للخير

ايًا كانت ايه هي نوع المشاكل اللي بتمر بيها أو الضغوطات اللي حوالين منك دايمًا حط في بالك إن ربنا دايمًا مدبرلك الخير في طريقك و عمره ما هيسيبك .. مهما كنت بعيد تقدر ترجع و هو دايمًا بيقبلنا .. و بيستر علينا دايمًا .. و بص حواليك هتلاقي انك عايش في نِعَم .كتير هو سايبها حوالينا حتي رغم اننا مش احسن حاجة بس هو دايمًا بيحبنا .. و سايب في طريقنا الخير .